Rəsmi saytların reytinqi: hansı daha çox izlənir, hansı daha çox oxunur? - TƏHLİL

2025-ci ilin iyul ayında dövlət qurumlarının rəsmi saytlarına olan maraqda nəzərəçarpacaq dəyişikliklər müşahidə olunub. Media Təhlil Mərkəzinin (MTM) apardığı təhlilə əsasən, ziyarətlərin sayına görə lider Elm və Təhsil Nazirliyi olub.  Hesabat dövründə nazirliyin portalına 391 min dəfə daxil olunub. Bu, iyun ayı ilə müqayisədə 22% çoxdur.

İkinci yerdə 227 min ziyarət ilə Əmək və Əhalinin Sosial Müdafiəsi Nazirliyi qərarlaşıb (baxmayaraq ki, auditoriyası 15,9% azalıb).

İlk üçlüyü isə Xarici İşlər Nazirliyi tamamlayıb, 56%-lik artımla sayta 218 min ziyarət qeydə alınıb.

Lakin yüksək ziyarət həmişə istifadəçi iştirakının dərinliyi demək deyil. İstifadəçilərin saytda orta qalma müddətinə baxdıqda, burada da Maliyyə Nazirliyi lider olaraq qalıb. Ziyarətçilər bu portaldan istifadə edərkən orta hesabla 19 dəqiqəyə yaxın vaxt sərf ediblər. Bu göstərici iyun ayı ilə müqayisədə bir qədər azalsa da, digər qurumlarla müqayisədə xeyli yüksəkdir.

Sonrakı yerlərdə Fövqəladə Hallar Nazirliyi (4 dəqiqə) və Mədəniyyət Nazirliyi (3 dəqiqə 14 saniyə) gəlir. Bu fakt göstərir ki, istifadəçilər həmin resurslarda əsasən hesabatlarla, sənədlərlə və təlimatlarla tanış olduqları üçün daha uzun müddət qalırlar.

Rəsmi saytlardakı bölmələrə daxil olma sayına dair statistikaya gəldikdə Maliyyə Nazirliyi bu göstərici üzrə də ilk pillədə yer alıb. Belə ki, Maliyyə Nazirliyinin rəsmi saytına daxil olan hər bir istifadəçi saytda yerləşən bölmələrdən orta hesabla 13,6-sına daxil olub. Digər qurumların saytlarında bu göstərici əsasən 2–4 bölmə arasında dəyişib. İkinci yerdə İqtisadiyyat Nazirliyi (4,1 bölmə), üçüncü yerdə isə Fövqəladə Hallar Nazirliyi (3,1 bölmə) qərarlaşıb.

Aparılan təhlil göstərir ki, təhsil və xarici siyasət mövzuları geniş auditoriyanın diqqətini cəlb etsə də, istifadəçilər həmin saytlarda çox vaxt keçirmirlər. Əksinə, maliyyə və iqtisadiyyatla bağlı resurslar daha az ziyarətçi toplasa da, onların saytlarda qalma səviyyəsi daha yüksək olur. Bu da o deməkdir ki, bəzi istifadəçilər sürətli şəkildə xəbər və əlaqə məlumatı axtarır, digərləri isə normativ sənədləri və hesabatları ətraflı öyrənirlər.