İsrail və Suriya sentyabrda təhlükəsizlik sazişi imzalaya bilər

Donald Tramp daha bir münaqişədə sülhməramlı kimi çıxış etmək niyyətindədir.

Təhlil.az xəbər verir ki, ərəb mediasının məlumatına görə, Ağ Ev İsrail və Suriya hakimiyyəti arasında görüş hazırlayır. İsrail və Suriya təhlükəsizlik məsələlərində təmasdadır. Vaşinqtonun vasitəçiliyi ilə sentyabrda razılaşma əldə oluna bilər. Məlumata görə ABŞ İsrailin baş naziri Benyamin Netanyahu, Suriya prezidenti Əhməd əl-Şara və Donald Trampın qatılacağı görüşün təfərrüatlarını hazırlayır.

“Bu istiqamətdə atılan addımlardan biri bu yaxınlarda Suriyanın BMT-də danışıqlar aparmaq üçün genişləndirilmiş səlahiyyətlərə malik yeni nümayəndəsinin təyin edilməsi olub”, - mənbə bildirib.

Qeyd olunur ki, iki ölkə liderləri arasında görüş Nyu-Yorkda BMT Baş Assambleyası çərçivəsində baş tuta bilər. Sənədlər münasibətlərin normallaşdırılması vektorunu təyin edəcək, lakin bu, tam hüquqlu sülh sazişi olmayacaq.

Parisdə Dəməşq və Təl-Əviv nümayəndələri arasında danışıqlar prosesinin inkişafı haqqında da məlumatlar var.

İyun ayında isə “The Times of Israel” yazıb ki, yeni Dəməşq beynəlxalq səviyyədə tanınması müqabilində İsrailin Qolan təpələrinin qaytarılması tələbindən imtina edə bilər.