Tramp Zelenskiyə söz verib

ABŞ prezidenti Donald Tramp avqustun 15-də keçiriləcək görüşdə Vladimir Putinlə Ukrayna əraziləri məsələsini müzakirə etməyəcək. Təhlil.az xəbər verir ki, o, bu barədə çərşənbə günü Ukrayna prezidenti Vladimir Zelenski və Avropa liderləri ilə onlayn konfransda bildirib.

Tramp qeyd-şərtsiz atəşkəs əldə etmək niyyətində olduğunu qeyd edib. Eyni zamanda, Ağ Evin rəhbəri və Avropa liderləri razılaşıblar ki, sülh danışıqları yalnız atəşkəs əldə edildikdən sonra başlaya bilər və Ukrayna öz ərazilərinin gələcəyi və sülh şərtlərinin müzakirəsində iştirak etməlidir.

Eyni zamanda, NBC mənbələrindən biri bildirib ki, bəzi Avropa liderlərində Trampın Putinlə görüşün nəticəsi ilə bağlı çox da optimist olmadığı təəssüratları yaranıb. Əvvəllər ABŞ president administrasiyasında çalışmış adı açıqlanmayan məmur isə CNN ilə söhbətində Trampın müttəfiqlərini öz tərəfində saxlamağa üstünlük verdiyini və Rusiya prezidenti ilə görüşdə hər şey ola biləcəyini vurğulayıb.

“Onlayn konfransda həmçinin Rusiyaya qarşı yeni məhdudiyyətlərin tətbiqi və Tramp ilə Putin arasında danışıqların o qədər də rəvan getmədiyi təqdirdə Moskvanın ticarət tərəfdaşlarına qarşı ikinci dərəcəli sanksiyalar müzakirə edilib. Lakin Ağ Ev rəhbəri bu məsələ ilə bağlı heç bir vəd verməyib”, - NBC yazır.