Vaşinqton görüşü erməni müxalifətinə zərbə oldu - ŞƏRH

Avqustun 8-də Azərbaycan Respublikasının Prezidenti İlham Əliyev, Amerika Birləşmiş Ştatlarının Prezidenti Donald Tramp və Ermənistan Respublikasının Baş naziri Nikol Paşinyan Azərbaycan Respublikasının Prezidentinin və Ermənistan Respublikasının Baş nazirinin Amerika Birləşmiş Ştatlarının Vaşinqton şəhərində keçirilmiş görüşünə dair Birgə Bəyannaməni imzaladılar. Bu sənəd Cənubi Qafqazda geosiyasi reallığın dəyişməsi, iki ölkə arasında sülhə doğru daha bir qəti addım, regiondakı kommunikasiyaların blokdan açılması, Zəngəzur dəhlizinin işə düşməsi, sərhədlərin delimitasiya və demarkasiyasının sürətlənməsi deməkdir. Vaşinqtonda imzalanan bu Bəyannamə erməni cəmiyyəti üçün gözlənilməz olmaqla yanaşı, erməni müxalifətinə də zərbə oldu. Söhbət xüsusən də Qarabağ klanından gedir. Çünki son beş ildə Moskvanın diqtəsi ilə Qarabağ klanı kommunikasiyaların açılmasına, sülhə və inkişafa mane olurdu. Belə bir kartın əldən verilməsi isə bu klanın məğlubiyyəti, siyasi səhnədən silinməsi deməkdir.

Bununla belə, ehtimal etmək olar ki, sənədin imzalanması erməni siyasi mühitində gərginliyin artmasına səbəb olacaq. Çünki son günlər Rusiyanın bir sıra siyasi dairələrində səsləndirilən fikirlər bunu deməyə əsas verir. Şübhəsiz ki, axır vaxtlar Ermənistanın ikinci prezidenti Robert Köçəryanın aktivləşərək bir sıra açıqlamalar verməsi də müəyyən planın mövcudluğunu göstərir. Eyni zamanda, Rusiya XİN sözçüsü Mariya Zaxarovanın da eyhamlı açıqlamalarını bu səpkidə dəyərləndirmək lazımdır. Görünür, Qarabağ klanı Rusiyadan göstərişlər alaraq vəziyyəti yenidən pozmağa çalışacaq.

Qeyd etmək yerinə düşər ki, bu Bəyannamə Ermənistanda Paşinyan hakimiyyətinə qarşı fəaliyyət göstərən digər müxalif qüvvələrə də ciddi zərbə olub. Hər gün müxtəlif teoriyalar səsləndirən, baş naziri torpaqları təhvil verməkdə ittiham edən müxalifətin planları suya düşüb. Bu isə o deməkdir ki, artıq baş nazir seçkilərə rahatlıqla gedə bilər. Çünki dünən də sülh müqaviləsinin mətninin dərc edilməsi erməni cəmiyyətində birmənalı qarşılanmayıb. Müharibədən qorxan, bu səbəbdən ölkəni tərk edən sadə erməni vətəndaşları belə bir təhlükənin artıq mövcud olmadığını dərk edib. Bu isə hər zaman xalqı müharibə təhdidi ilə gərginlikdə saxlayan erməni müxalifətinin önəmli bir kartının əlindən çıxması deməkdir.

Hikmət Həsənov