Cənubi Koreya və ABŞ orduları 18-28 avqust tarixlərində genişmiqyaslı təlimlər keçirəcək

Koreya Respublikası və ABŞ hərbçiləri avqustun 18-28-də illik genişmiqyaslı “Ulchi Freedom Shield” təlimləri keçirəcək. Təhlil.az xəbər verir ki, bu barədə “Yonhap” xəbər agentliyi məlumat yayıb.

Hər iki ölkənin silahlı qüvvələrinin nümayəndələri qeyd ediblər ki, təlimlər real təhlükələri əks etdirəcək və müttəfiqlərin bütün sahələrdə döyüş hazırlığını artırmaq məqsədi daşıyır.

“Təlim milli böhranın idarə edilməsi bacarıqlarını, mülki müdafiəyə cavab vermək qabiliyyətini və kibertəhlükəsizliyi gücləndirmək üçün Koreya hökuməti daxilində qurumlararası koordinasiyanı asanlaşdıracaq”, - iki ölkənin hərbçilərinin açıqlamasında deyilir.

Onların fikrincə, “Ulchi Freedom Shield” Cənubi Koreya hökumətinin hərbi əməliyyatlara hazırlıq səviyyəsinin yüksəldilməsinə töhfə verəcək.

Təlim zamanı Cənubi Koreya ənənəvi olaraq mülki müdafiə, o cümlədən ümummilli hava hücumu təlimləri keçirir. Sahə manevrlərinə əlavə olaraq, “Ulchi Freedom Shield” kompüter simulyasiyasından istifadə edərək komanda postu təlimlərini əhatə edir.

“Yonhap” xəbər agentliyi bildirir ki, builki səhra təlimlərinin yarısı (20 təlim) sentyabr ayına təxirə salına bilər. Daha əvvəl birləşmə naziri Jeonq Donq-yeon prezidentə “Ulchi Freedom Shield” təlimlərinin miqyasını azaltmağı təklif edəcəyini bildirmişdi.