BMT Pakistanı 1,3 milyon əfqan qaçqını ekstradisiya etməyi dayandırmağa çağırıb

Birləşmiş Millətlər Təşkilatının Qaçqınlar üzrə Ali Komissarlığı (UNHCR) Pakistan hakimiyyətini BMT tərəfindən rəsmi olaraq qaçqın kimi qeydə alınan 1,3 milyon əfqanı öz ölkələrinə zorla təhvil verməkdən çəkinməyə çağırıb.

“BMT QAK bu əfqanları bir neçə onilliklər ərzində rəsmi olaraq qaçqın kimi tanıyıb. Onların öz vətənlərinə məcburi qayıtması insanlıq prinsiplərinin və Pakistanda məskunlaşmaları üçün onlara verilən təminatların pozulması olardı”, - deyə məlumatda deyilir.

Təhlil.az xəbər verir ki, bundan əvvəl Pakistan hökuməti sentyabrın 1-dən etibarən İslam Respublikasında vizasız yaşamaq üçün rəsmi hüquqa malik əfqan miqrantların sonuncu qrupu olan qeydiyyatı təsdiq edən (PoR) kartlara sahib 1,3 milyondan çox əfqan qaçqını vətənlərinə qaytarmağa və deportasiya etməyə başlayacağını açıqlayıb. Onların ekstradisiyası ilə bağlı qərar 30 iyun tarixində PoR müddəti bitdikdən sonra qəbul edilib və buna görə də onlar qeyri-qanuni qaçqın hesab ediliblər.

Məlumata görə, 2023-cü ilin sentyabrından bəri Pakistandan 800 mindən çox əfqan miqrant evlərinə qayıdıb. Onlardan 527 mindən çoxu hakimiyyət tərəfindən qovulub, qalanları isə könüllü olaraq ölkəni tərk edib.

Qeyd edək ki, son 40 il ərzində Cenevrə Konvensiyasına əsasən Əfqanıstandan 4 milyondan çox qaçqın Pakistana gəlib. Onlardan 1,7 milyonunun yaşayış sənədləri yoxdur, təxminən 1,3 milyonu immiqrant qeydiyyatı alıb, daha 1 milyon əfqan isə qaçqın statusuna malikdir ki, bu da onlara Pakistan torpaqlarında qalmağa imkan verir.