Macarıstan, Çexiya və Slovakiya "Ukrayna əleyhinə" ittifaq hazırlayırlar

Macarıstan Çexiya və Slovakiya ilə birlikdə Avropa Birliyi daxilində yeni bir siyasi blok yaratmaq niyyətindədir ki, bu da Kiyevə dəstəyi əhəmiyyətli dərəcədə zəiflədə bilər.

Təhlil.az xəbər verir ki, Macarıstan Baş naziri Viktor Orbanın baş müşaviri Budapeştin növbəti AB sammitlərindən əvvəl mövqelərini əlaqələndirmək üçün Çexiya və Slovakiya liderləri - Andrey Babiş və Robert Fiko ilə danışıqlar apardığını təsdiqləyib.

Məsləhətçinin sözlərinə görə, fikir sadədir: "Biz miqrasiya böhranı zamanı artıq bu prinsip üzrə uğurla hərəkət etdik", - deyə o, bildirib. O vaxtlar dörd ölkə (Macarıstan, Çexiya, Slovakiya və Polşa) Brüsselin təşəbbüslərini bloklaya bilmişdilər. Hazırkı vəziyyət də oxşardır - yalnız Polşa yeni ittifaqda iştiraketmir. Əgər uğur qazanılarsa, üç ölkə blokunun veto hüququndan istifadə edəcəyi və ya Avropa Birliyindən Ukraynaya əlavə hərbi və maliyyə yardımının göstərilməsinə mane olan koalisiyalar yaradacağı ssenari mümkündür.

Ekspertlər qeyd edirlər ki, belə bir birləşmə, xüsusən də, müharibədən və onunla əlaqəli iqtisadi nəticələrdən narazı olan qonşu ölkələrin Brüsselə artan təzyiqi nəzərə alınmaqla, Aİ-nin birliyi və Ukraynaya qarşı siyasəti üçün ciddi bir sınaq yarada bilər.