Almaniyalı nazir:“Putin Almaniyanı, onun mentalitetini və zəif tərəflərini çox yaxşı tanıyır”

Almaniyanın müdafiə naziri Boris Pistorius ölkənin hava məkanında pilotsuz uçuş aparatlarının müşahidə edilməsi ilə bağlı xəbərləri şərh edib və ictimaiyyəti sakitliyə çağırıb.

Təhlil.az xəbər verir ki,  nazir “Handelsblatt” nəşrinə müsahibəsində bildirib ki, bu hadisələr çox güman ki, qorxu və qeyri-müəyyənlik mühiti yaratmaq məqsədi daşıyan psixoloji əməliyyatlarla əlaqəlidir.

Onun sözlərinə görə, Rusiya bu cür addımlardan sabitliyi pozmaq və Almaniyada ictimai əhval-ruhiyyəyə təsir göstərmək üçün istifadə edir:
“Söhbət təxribatdan gedir — qorxu yaratmaq, ictimaiyyəti çaşdırmaq, şübhələr səpmək və lazımsız müzakirələrə səbəb olmaq cəhdidir.”

Pistorius vurğulayıb ki, Rusiya Prezidenti Vladimir Putin Almaniyanı, onun mentalitetini, zəif tərəflərini və “cəmiyyətin reflekslərini” çox yaxşı tanıyır:
“O, bizim nədən narahat olduğumuzu, vəziyyəti sabitləşdirmək üçün hansı hisslərin tətiklənə biləcəyini anlayır. Ona görə də bundan istifadə edir,” – deyə nazir qeyd edib.

Almaniya müdafiə naziri əlavə edib ki, ölkə bu cür psixoloji manipulyasiyalara boyun əyməməli və soyuqqanlılığını qorumalıdır.