Tramp TikTok müqaviləsi ilə bağlı sərəncam imzaladı

Tramp TikTok müqaviləsi ilə bağlı sərəncam imzaladı.

Təhlil.az xəbər verir ki, ABŞ prezidenti Donald Tramp cümə axşamı günü TikTok-un ölkədəki aktivlərinin Amerika və beynəlxalq investorlara satılmasının milli təhlükəsizlik tələblərinə cavab verəcəyini nəzərdə tutan sərəncam imzalayıb.

Tramp çıxışında bildirib ki, Çin prezidenti Si Cinpin də bu planları təsdiqləyib.

ABŞ-ın vitse-prezidenti C.D. Vens isə sövdələşmənin təxminən 14 milyard dollar dəyərində olacağını açıqlayıb:
“Çin tərəfdən müəyyən müqavimət oldu, lakin əldə etmək istədiyimiz əsas məqsəd TikTok-un fəaliyyətini davam etdirməsi idi. Eyni zamanda biz amerikalıların məlumatlarının məxfiliyinin qorunmasına və qanunun tələblərinə uyğunluğuna əmin olmaq istəyirdik”, – deyə Vens Oval Ofisdə jurnalistlərə bildirib.

O, əlavə edib:
“Amerikalılar TikTok-dan istifadə etməyə davam edəcəklər, lakin bundan sonra daha çox əminliklə. Çünki onların məlumatları təhlükəsiz olacaq və platforma təbliğat vasitəsi kimi istifadə edilməyəcək”.