Kanada ABŞ və Meksika ilə ticarət sazişlərini yenidən nəzərdən keçirəcək

Kanada ABŞ və Meksika ilə Azad Ticarət Sazişinə (USMCA) yenidən baxılması üzrə məsləhətləşmələrə ən qısa zamanda başlayacaq. Təhlil.az xəbər verir ki, bu barədə CBC televiziyası Kanadanın idarələrarası əlaqələr naziri və ABŞ ilə ticarətə cavabdeh olan Dominik Le Blanın ofisindəki mənbələrə istinadən məlumat verib. Onun sözlərinə görə, rəsmi məsləhətləşmələr gələn həftədən başlaya bilər.

Sentyabrın əvvəlində “The Wall Street Journal” (WSJ) Tramp administrasiyasının da tezliklə USMCA-ya yenidən baxmağa başlamaq niyyətində olduğunu bildirdi. WSJ-nin məlumatına görə, ABŞ Ticarət Nümayəndəliyinin Ofisi oktyabrın 4-dən gec olmayaraq saziş üzrə ictimai məsləhətləşmələrə başlayacaq və proses bir neçə ay çəkəcək. ABŞ administrasiyası 2026-cı ilin yanvarında biznes və həmkarlar ittifaqlarından şərhlər istəməli, ictimai dinləmələr keçirməli və Konqresə hesabat təqdim etməlidir. İyulun 1-dək sazişdə iştirak edən ölkələrin nümayəndələrinin üçtərəfli görüşünün keçirilməsi planlaşdırılır. Ottava və Vaşinqton avqustun 1-dək ticarət razılaşmasına nail ola bilmədikdən sonra ABŞ Prezidenti Donald Tramp USMCA-nın əhatə etmədiyi bir sıra Kanada mallarına tətbiq edilən və həmin gün məhsul dəyərinin 25%-i məbləğində olmaqla qüvvəyə minən tarifləri dəyərin 35%-i məbləğinə qədər artıran bir sərəncam imzalayıb. O, həmçinin bildirib ki, Kanada Fələstini tanımaq niyyətini açıqladığı üçün Ottava ilə ticarət razılaşması əldə etmək onun üçün çox çətin olacaq. Kanada bir neçə aydır ki, ABŞ ilə ticarət razılaşması əldə etməyə cəhd edir.