Tofiq Zülfüqarov: Ermənistan seçim etməlidir - MÜSAHİBƏ

Azərbaycan Prezidenti İlham Əliyevlə ABŞ Prezidenti Donald Tramp arasında Vaşinqtonda keçirilən danışıqlar göstərdi ki, iki ölkə arasında münasibətlərdə müsbətə doğru əsaslı dəyişikliklər müəyyən edilib.

Bu sözləri təhlil.az-a açıqlamasında Azərbaycanın keçmiş xarici işlər naziri, politoloq Tofiq Zülfüqarov deyib.

“Co Baydenin prezidentliyi dövrü erməni diasporunun demokratik administrasiyaya ciddi təsiri ilə müşahidə edilən anti-Azərbaycan münasibəti ilə səciyyələnirdi. Onların bu eqoist siyasəti ABŞ-nin milli maraqları ilə ziddiyyət təşkil edirdi.

Tramp administrasiyası bu məsələ ilə bağlı kitabı bağladı və ilk növbədə Azərbaycanla ABŞ arasında qarşılıqlı əlaqələrin əvvəlki səviyyəsini bərpa etmək üçün yeni imkanlar açdı, onun daha da dərinləşdirilməsi perspektivlərini qeyd etdi", - diplomat bildirib.

Onun sözlərinə görə, Vaşinqtonda keçirilən görüşlərin yekunları üzrə qəbul edilmiş qərarlar və imzalanmış sənədlər Azərbaycan və Ermənistanın münaqişənin səhifəsini bağlamaq və sülhə doğru mütərəqqi hərəkata başlamaq üçün siyasi əzmə sahib olduğunun göstəricisidir.

“Sülh müqaviləsinin imzalanması 2026-cı ildən tez olmayaraq, Ermənistan Konstitusiyasında Azərbaycana qarşı ərazi iddialarını ehtiva edən müddəalar aradan qaldırıldıqda mümkündür. Bunsuz Bakı ilə İrəvan arasında tam sülhdən danışmaq çətindir və demək olar ki, mümkün deyil.

Məsələ ondadır ki, Ermənistan Konstitusiyasının dəyişdirilməsi referendumun keçirilməsini nəzərdə tutur. Onda görəcəyik ki, Ermənistan cəmiyyəti inkişafın yeni vektorunu seçməyə hazırdır, ya yox", - Zülfüqarov qeyd edib.

Keçmiş nazir vurğulayıb ki, Ermənistan Cənubi Qafqazda kiminsə forpostu kimi qalmağa, yoxsa sülhsevər qonşu olmağa üstünlük verəcək, bunu zaman göstərəcək.

“Hadisələrin gedişatından asılı olaraq, biz sülh prosesinin daha da inkişaf etdirilməsinin nə dərəcədə mümkün ola biləcəyini görəcəyik. Ermənistan seçim etməli və Rusiyanın Cənubi Qafqazdakı forpostu olmaqdan əl çəkməlidir və ümumiyyətlə, bəyan etdiklərini icra etməlidir. Qərblə əlaqələri genişləndirməlidir.

Baydenin dövründə Ermənistanda elə bir hiss yaratmağa çalışırdılar ki, o, iki stulda otura bilər - Rusiya ilə hərbi ittifaqda olmaq və eyni zamanda, Qərbin yardımına çıxış əldə etmək. Gələcəkdə Ermənistan iki kresloda oturmağa davam edə bilməyəcək. Dünyada gedən proseslər, ümumiyyətlə, heç kəsə belə imkan vermir", - Zülfüqarov deyib.

Rasim Babayev