Ekspert: “Minsk qrupunun sonu sülhün başlanğıcıdır” - AÇIQLAMA

Azərbaycan Prezidenti İlham Əliyev, Ermənistanın baş naziri Nikol Paşinyan və ABŞ Prezidenti Donald Tramp arasında Vaşinqtonda keçirilən üçtərəfli görüş əlamətdar hadisə olmaqla yanaşı, Bakı ilə İrəvan arasında sülh müqaviləsinin bağlanması istiqamətində mühüm irəliləyişdir.

Bunu fikirləri tehlil.az saytına açıqlamasında Milli təhlükəsizlik məsələləri üzrə amerikalı ekspert, "The Washington Outsider" qəzetinin baş redaktoru İrina Zukerman deyib. 

Ekspertin sözlərinə görə, görüşdə “Zəngəzur dəhlizi” layihəsinin icrası ilə bağlı məsələnin həll olunması diqqətəlayiq nəticələrdəndir:

“Bakı və İrəvan nəhayət bu məsələni razılaşdırıblar. Layihə həm mühüm iqtisadi rıçaq, həm də investor rolunda çıxış edən ABŞ-nin xeyrinə həll olunub. ABŞ bu dəhlizin inkişafında və regionda mühüm iqtisadi əlaqələrin qurulmasında dəstəkləyici rol oynayacaq. Bütün bunlar çox müsbət nəticədir”.

İrina Zukerman görüşün digər əhəmiyyətli məqamı kimi ABŞ-nin 907-ci düzəlişinin dondurulması ilə bağlı əldə olunan razılaşmanı göstərib:

“Düşünürəm ki, yekun sülh müqaviləsi imzalandıqdan sonra ABŞ Konqresinin bu düzəlişi ləğv etməsində problem olmayacaq. Xüsusilə İrəvanın buna israr etməsi mənasızdır. ABŞ-dəki erməni diasporunun lobbiçiləri müəyyən maneələr yaratmağa çalışa bilərlər. Buna görə də yaxşı olardı ki, 907-ci düzəlişin ləğvi 2026-cı il parlament seçkilərinə qədər baş tutsun”. 

Ekspert həmçinin Ermənistan Konstitusiyasına dəyişiklik edilməsinin vacibliyini vurğulayıb:

“Ermənistan Konstitusiyasının dəyişdirilməsi məsələsi hələ bitməyib. Bu dəyişikliklər baş vermədən Bakı tərəfindən sülh müqaviləsinin imzalanması çətin görünür. Bu, çox vacib məsələdir”. 

İrina Zukerman ATƏT-in Minsk qrupunun buraxılması qərarını da yüksək qiymətləndirib və bunu regionda sülh prosesinin yeni mərhələyə keçməsi kimi dəyərləndirib.

Rasim Babayev