Rizvan Hüseynov: “Vaşinqton görüşü sülh yolunda mühüm addımdır” - AÇIQLAMA

Azərbaycan Prezidenti İlham Əliyev, Ermənistan Baş naziri Nikol Paşinyan və ABŞ Prezidenti Donald Trampın Vaşinqtondakı üçtərəfli görüşü Bakı ilə İrəvan arasında sülh sazişi istiqamətində çox mühüm irəliləyişdir.

Bu fikirləri təhlil.az saytına açıqlamasında Qafqaz Tarixi Mərkəzinin direktoru, “Azərbaycan və Qafqazda erməni məsələsi” monoqrafiyasının müəllifi Rizvan Hüseynov bildirib

O bildirib ki, görüşdən sonra birbaşa sülh müqaviləsi olmasa da, memorandum və ya niyyət protokolunun imzalanacağı gözlənilir: "Bu sənəd tərəflərin sülh prosesinə və maneələrin aradan qaldırılmasına hazır olduğunu göstərəcək"

Tarixçi hesab edir ki, Vaşinqton bu prosesdə təşəbbüsü Moskvadan alıb və artıq “Tramp dəhlizi” kimi təqdim olunan Zəngəzur dəhlizinə son nöqtə qoyula bilər.

Ekspertin fikrincə, Rusiya prosesdən özünü kənarlaşdırıb:

“Moskva 2020-ci ildə ən əlverişli başlanğıc mövqeyinə sahib idi, amma 4 ildə nə təhlükəsizliyi təmin etdi, nə də Zəngəzur yolunun açılmasına nail oldu. Bu uğursuzluğa görə yalnız özü günahkardır”.

R. Hüseynov həmçinin ATƏT-in Minsk Qrupunun ləğv edilməsinin vacibliyini də vurğulayıb.

O, Zəngəzur dəhlizinin açılması istiqamətində irəliləyişin mümkün olduğunu, hətta yolun Amerika şirkətinə icarəyə verilməsi ehtimalını istisna etməyib.

Ekspert qeyd edib ki, rəsmi İrəvan Azərbaycanın təkliflərinə getdikcə yaxınlaşır:

“Bakı və İrəvan nə qədər tez ortaq dil tapsa, xarici aktorların manipulyasiya imkanları bir o qədər azalacaq. Ermənistan üçün də, Azərbaycan üçün də, region üçün də sülh ən çox Ermənistanın özünə lazımdır”.

Rasim Babayev