"Rusiya nə Azərbaycandan, nə də Gürcüstandan Gümrüyə yol tapa bilməyəcək” - AÇIQLAMA

Cənubi Qafqazda geosiyasi mövqelərin yenidən formalaşdığı bir dövrdə Rusiya hərbi-nəqliyyat təyyarələrinin Ermənistandakı Gümrü bazasına uçuş ehtimalı gündəmdədir. Lakin bu ehtimal reallıqdan uzaqdır". 

Bunu Təhlil.az saytına açıqlamasında Milli Məclisin deputatı, politoloq Rasim Musabəyov deyib. 

Onun fikrincə, Rusiya Azərbaycandan hava dəhlizi istəməyə cəsarət etməz: "Nə Azərbaycan, nə də Gürcüstan Rusiya hərbi təyyarələrinin bölgə üzərindən uçmasına icazə verməyəcək. Lakin mən şübhə edirəm ki, Rusiya tərəfi Azərbaycandan Ermənistana silah daşımaq üçün hava dəhlizi tələb etməyə cürət edib. Amma istəsə belə, nə biz, nə də Gürcüstan bu dəhlizi açmayacaq. Rusiya üçün bu istiqamətdə qapılar bağlıdır”.

Deputatın sözlərinə görə, Moskva Gümrüdəki ordunu Ermənistanın baş naziri Nikol Paşinyana qarşı istifadə edə bilməyəcək: 

"Amma buna baxmayaraq, rus agentləri hələ də Ermənistanda fəal şəkildə işləyirlər. Rusiya konsulluğunun səssiz fəaliyyəti nəticəsində Gümrüdə heç kimin tanımadığı kriminal keçmişə malik bir kommunist qəfildən mer seçildi. Halbuki Ermənistanda kommunistləri heç kim xatırlamır. Amma bu oyun bütün ölkə üzrə təkrarlana bilməz. Rusiya artıq həmin kartı itirib”.

R. Musabəyov qeyd edib ki, Gümrüdə silah yoxdur və hərbi baza faktiki boşdur: 

"Gümrüdə yerləşən Rusiya hərbi bazası hazırda döyüş qabiliyyətindən uzaqdır. Mənim məlumatıma görə, İkinci Qarabağ müharibəsi zamanı Ermənistanda yerləşən 102-ci Rusiya hərbi bazasının anbarları demək olar ki, tam boşaldılıb. Həmin sursatlar İrəvanda toplanaraq Azərbaycana qarşı istifadə olunub. Bu gün həmin anbarlar bərpa olunmayıb, əllərində cəmi bir-iki günlük döyüş sursatı var". 

Deputat vurğulayıb ki, Rusiya hərbi ehtiyatlarını artırmağa çalışsa da, bu yolla bölgədəki nüfuzunu bərpa edə bilməyəcək:

“2026-cı ildə Ermənistanda keçiriləcək seçkilərdə Nikol Paşinyan yenə qalib gələrsə, Rusiya bazası Ermənistanda qala bilməyəcək:  

"Əgər Moskva Paşinyan hökumətinə münasibətini dəyişməzsə, qarşıdakı parlament seçkilərində onun komandası qalib gəldikdən sonra Ermənistan artıq Rusiya hərbi bazasına və sərhədçilərinə ehtiyac duymayacaq. Bu, o deməkdir ki, Ermənistan da Rusiya hərbi varlığından xilas olacaq. Beləliklə, Cənubi Qafqaz nəhayət Moskvanın hərbi təsirindən azad olacaq. Əlbəttə, Abxaziya və Sxinvali bölgəsi istisna olmaqla”.

Rasim Babayev