Qoliqorski: “Diasporlara təzyiq Rusiya iqtisadiyyatına zərbə vura bilər” - AÇIQLAMA

2024-cü ilin dekabrında Qroznı üzərində vurulan AZAL təyyarəsi ilə bağlı hadisə hələ də beynəlxalq ictimaiyyətin diqqətindədir. Britaniyalı jurnalist, prodüser və siyasi ekspert, BBC Dünya Xidmətinin keçmiş baş redaktoru Yuri Qoliqorski təhlil.az-a açıqlamasında bildirib ki, Rusiya bu faciənin məsuliyyətini öz üzərinə götürməli, ədalətli araşdırma aparmalı və Azərbaycandan üzr istəməlidir.

“Dəhşətli faciə baş verdi, insanlar öldü. Belə hallarda dövlətlər başlarını aşağı salıb açıq şəkildə etiraf edirlər:

"Bu, bizim səhvimiz idi. Bağışlayın. Mərhumların ailələrinə kompensasiya verməyə hazırıq. Keçmişi unutmadan, birlikdə irəli gedək.  Amma Moskva bu yolu seçmir. Əvəzində deyirlər ki, araşdırma aparılır, bu da məsələni uzatmaq və məsuliyyətdən yayınmaq cəhdidir”. 

Ekspert bildirib ki, Azərbaycan dəfələrlə Rusiya Xarici İşlər Nazirliyinə rəsmi sorğular göndərsə də, cavablar dəyişmir: “İstintaq davam edir.”

“Nəyi araşdırırsınız? Dağıntılar var, ölənlər var, sağ qalanlar var, qara qutular var. Hər şey aydındır. Amma məsələ uzadılır. Məqsəd ya unutdurmaq, ya da Bakıya mesaj verməkdir: ‘Biz heç vaxt üzr istəmirik. Biz haqlıyıq.’ Hazırda Bakı ilə Moskva arasında gərginliyin əsas səbəbi məhz budur,” – deyə ekspert bildirib.

Qoliqorski həmçinin Rusiyada Azərbaycan diasporuna qarşı təzyiqlərdən də danışıb və bu cür yanaşmanın dövlətlərarası münasibətlərə mənfi təsir göstərə biləcəyini vurğulayıb:

“Diasporlar sadəcə pul qazanmaq üçün gələn insanlar deyil. Onlar dövlətlər arasında "ünsiyyət gəmiləridir". Bugünkü Moskva, Sankt-Peterburq və digər iri şəhərləri diasporların iştirakı olmadan təsəvvür etmək mümkün deyil, bu zaman iqtisadiyyat çökərdi”. 

O, Böyük Britaniya ilə paralel apararaq qeyd edib ki, Britaniyada səhiyyə sistemində çalışan miqrantlar çıxarılsa, sistem dərhal çökər:

“Ona görə də diasporlara qarşı ehtiyatlı olmaq və onların ölkənin iqtisadi və sosial həyatındakı rolunu düzgün qiymətləndirmək lazımdır. Pis sülh, yaxşı mübahisədən yaxşıdır”. 

Yekun olaraq, Qoliqorski hesab edir ki, Rusiya bu məsələdə səmimi mövqe nümayiş etdirməli, məsuliyyəti boynuna almalı və Azərbaycanla münasibətlərdə yeni səhifə açmaq üçün cəsarətli addım atmalıdır.

Rasim Babayev