Ekspert: “Trampın reaksiyası Azərbaycanın beynəlxalq çəkisinin göstəricisidir” - AÇIQLAMA

"Azərbaycanda peşəkar jurnalistikanın 150 illiyi təkcə media sahəsinin deyil, bütövlükdə cəmiyyətin bayramıdır. Prezident İlham Əliyevin iştirakı ilə keçirilən III Şuşa Qlobal Media Forumu da məhz bu əlamətdar yubileyin ruhuna uyğun şəkildə təşkil olunmuşdu". 

Bu fikri təhlil.az saytına açıqlamasında politoloq, Bakı Beynəlxalq Multikulturalizm Mərkəzinin müşaviri Tofiq Abbasov bildirib.

O bildirib ki, Dövlət başçısının III Şuşa Qlobal Media Forumu çıxışı zamanı səsləndirdiyi çağırışlar təkcə Azərbaycan deyil, bütövlükdə qlobal informasiya məkanına yönəlik mesajlarla zəngin olub: 

“Prezident İlham Əliyev çıxışında informasiya təhlükəsizliyinin təmin olunmasından tutmuş süni intellektin məsuliyyətli istifadəsinə qədər bir çox aktual məsələlərə toxundu. Bu çağırışlar tam vaxtında və çox həssas dövrdə səsləndi. Çünki bu gün biz klassik jurnalistikanın ideoloji təbliğat alətinə çevrilməsi meyillərinin necə gücləndiyini görürük”.

Ekspertin fikrincə, bəzi güc mərkəzləri informasiya məkanını manipulyasiya meydanına çevirməkdən çəkinmir və bu təhlükəli tendensiyalara qarşı Azərbaycanda aparılan siyasət rasional və prinsipial mövqe ilə seçilir: 

“Məhz bu səbəbdən Prezident İlham Əliyev media nümayəndələrinə müraciətində məsuliyyətli və dürüst olmağa çağırdı. Azərbaycan informasiya məkanında daim istifadəçiyə hörmətlə yanaşan, yalanı və manipulyasiyanı rədd edən bir yanaşma sərgiləyir”. 

T. Abbasov vurğulayıb ki, Azərbaycan beynəlxalq aləmdə kiçik və ya böyük ölkə bölgüsünün artıq aktuallığını itirdiyi bir zamanda, qlobal proseslərə məzmun verən ölkələrdən birinə çevrilib:

“COP29 zamanı Azərbaycan on azadlıqsevər və müstəqil düşüncəyə sahib ölkəyə qlobal platforma təqdim etdi. Azərbaycan onların səsini boğmaq istəyən neokolonial qüvvələrin qarşısında dayandı və söz azadlığı üçün real tribuna yaratdı”. 

Politoloq ABŞ Prezidenti Donald Trampın Prezident İlham Əliyevin III Şuşa Qlobal Media Forumunda çıxışına reaksiya verməsini də təsadüfi saymır.

Onun sözlərinə görə, bu dialoq Azərbaycanın beynəlxalq miqyasda artan çəkisinin və siyasi mövqeyinə olan etimadın göstəricisidir.

“Bu gün dünyada yaranan boşluqları məzmunla doldurmaq vaxtıdır. Azərbaycan məhz bu missiyanı üzərinə götürüb. Ölkəmiz həm regional, həm də qlobal informasiya sistemində dürüstlük, ədalət və şəffaflığa əsaslanan model təqdim edir. Şuşada keçirilən media forumu bu baxımdan uğurlu və strateji əhəmiyyətə malik tədbir kimi yadda qaldı”, – deyə Tofiq Abbasov əlavə edib. 

Rasim Babayev